الروز بالدجاج

الروز بالدجاج

الطريقة من الاخت حياة جزاها الله عنا كل خير

مقادير و طريقة تحضير الروز بالدجاج

و الطريقة ساهلة : فطنجرة كتحمري بصلة مشنفة و تزيدي عليها ليقامة ثوم + كمون + كركم + خرقوم ملون أصفر + هيل مطحون + قرنفل مطحون + قرفة + بزار + 3 ضويمات الزعفران + ملح

تخلطي كلشي و تزيدي الدجاج و تقلبيه شوية فليقامة و البصلة من الجيهتين و كتزيدي عليهم الماء سخون يكون شوية كثير باش تبقى عندنا مرقة كافية فاش نطيبو الروز من بعد ... أنا درت هادالشي فكوكوط نص ساعة و طاب الدجاج صفيتو من المرقة و دخلتو للفران يتحمر غير شوية و المرقة حتى هي صفيتها من التخا ديال البصلة و ليقامة و درت القياس اللي يكفيني لطياب الروز فطنجرة أخرى ما كتلصقش و زدت ضويمة ديال الزعفران و شفت الملح واش هي هاديك حيت خاصها تكون زايدة على قبل الروز ما يجيش باسل و دائما خاص المرقة اللي يطيب فيها تحسي بها شوية مالحة

فالوقت اللي كان كيطيب فيه الدجاج وجدت الحشوة اللي هي : لوز مقلي + شوية زبيب مقلي ( غير يتحط فالزيت و يتهز فالحين باش ما يتحرقش ) + بطاطا مقطعة مكعبات صغييييرة و مقلية + جزر مكعبات صغيرة و جلبانة مصلوقين + شعرية رقييييقة و طويلة ( درت ديال الأعشاش هرستها بيدي ) محمرة فالزيت

الطريقة فنفس المقلة فاش حمرت الشعرية كنزيد عليها شوية الماء سخون باش ترطاب و طيب + رشة من نفس ليقامة اللي لفوق من غير الثوم طبعا و كنخليها حتى تنشف من الماء و تلين و نزيد عليها داكالشي لاخر اللي وجدنا ديال الحشوة و نخلطهم مزيان و نبقى نديهم و نجيبهم فالمقلة باش يتجانسو واذا بغيتي ممكن تزيدي رشة من ليقامة اللي بغيتي ... وها هي واجدة

فاش كيطيب الروز و يولي حبة على حبة كنزيد عليه نص خليط الحشوة و نخلط كلشي غير بشوية ثم كنحط فوقهم الدجاج المحمر فالفران و نغطي كلشي بورق أليمنيوم و ندير غطاء الطنجرة و نخليهم مكتومين فذاك البخار ديال الروز باش يطلقو النكهة فبعضياتهم الروز + الحشوة + الدجاج لغاية وقت التقديم فالطبسيل حطيت الروز ثن الدجاج ثم زينت كلشي بنص خليط الحشوة الباقي و بالصحة و الراحة