ياصوت النبض ف عروقى يا أول لون ف تكوينى

ياصوت النبض ف عروقى يا أول لون ف تكوينى

يافجر الصبر على عمرى ف لحظة خوف تدفينى

يا أول معنى ف لسانى يا دمعة شوق بتروينى

اموت يا اما وتفضل ضحكتك عايشة

وأعيش لكن يعيش قلبك قصاد عينى







ياريت يا طبيب تطمنى

انا الأبن اللى ساجد بدعى للخالق

ودوبت الخدود من دمعة العاشق

لنبض القلب والننى

ياريت يا طبيب تقول قامت

وسألت فين يكون أبنى

صحيح يا طبيب حالتها يخير ؟

دى هى الأم والصحبة ونبع الخير

وهى الفجر والقمرة ونبض الطير

وهى جذورى فى الدنيا

وهى علاجى م التكشير

ياريت يا طبيب تبلغها

بأنى بدمى هفديها

وتسألها

اجيب ضحكة تدفيها؟

اجيب الفجر بدعايا

لرب الخلق يحميها؟

ياريت يا طبيب تطمنها

بأن تعبها شئ طارق

وهيفارق

وترجع شمس للحارة

وللحتة

ومعنى الحب فـ اللمة

وف القعدة

ياريت يا طبيب تقول قامت

وسالت فين يكون أبنى

وانا من لهفتى أجرى

واخدها فـ قلبى وفـ حضنى

وأبوس على كفها الطاهر

وأخبى الدمع لو ظاهر

واضحك ليها تضحكلى

ياريت يا طبيب ماتسألنيش

هبات الليلة ع الكرسى

ومش همشى

ولو تتقل حدود رمشى

ياريت يا طبيب تصحينى

تفرحنى
تقول قامت

اهداء لكل ام مريضة .. ربنا يشفى امى وامهات المسلمين جميعا يااااااااااارب