أشعار ليبيّة..من مدوّنة محمد الامين جدمور

بسم الله الرحمن الرحيم

اشعار جميلة اعجبتني فنقلتها لكم

الشكــــــــــوى لــــــــربي ** ياصاحبي ماني عليك امخبي

حقك عليا وعارفك متربي ** لكن مع الانذال مالك حيلة

نصحتك لوجه الله فيك وحبي ** لا العيب ترضى ولا حياة هزيلة‬

إن كان نشغلك دز السلام العاجل ** مع الريح ولامع الحمام الزاجل

سلامـــــــــــــــــــــــــــــك دزه ** ان كان بينا باقي عروق معزه

راهوا في غيابك خاطري استفزه ** الحاسد اللي من العيب ماهو خاجل

والشوق ياوليفي غصن عزمي هده ** يخطرلك الشوق يهد عزم الراجل؟؟؟‬

مازلت يا حلمي الثقيل ثقيل ** وقاطع انفاسي

ومازلت يا قلبي العليل عليل ** ولا من يواسي

ومازالت يا دموعي تسيل ** والقلب ناسي

لوكنت نعلم قبل قلبك قاسي ** لاشقيت بيك ولا وجعني راسي‬

ياللي عزيز مكانك ** مازال قلبي ع الوفا ماخانك

مانبدلك مازال قلبي وافي ** ومازال نابض بالحنان الدافي

مــــــوحال يبخل بالعطا مجدافي ** لين يوصله مركب غلاي حنانك

يهون عليا من جنون اريافي ** ويبقى مقرة في ربوع اوطانك‬

الخاطر شرب كاس سم اللفاعي * وعايش ايداعي * ويكمى فعبرات يوم الوداعي

الخاطر شرب كاس سم الهوايش * محسوب موش عايش * يكمي فعبرات مر وغشايش

وعقلي بعد إن رزنتا تم طايش * امخرب اطباعي * ايجيب صورتك حتى وان ضل واعي‬

حاولت ننسى مـا القيـت عزيـــما ** مصعب النسيـان عللـي هايــــم

حـاولـت ننـســى غــــــــــــــــرورك ** ونبعد عليـك ونتركـك لشعـــورك

لكـن حنينـي شالنــي لبحـورك ** ولقيت نفسي فـي غريقـك عايــم

صعــــــــــــب نـسـيــــــــــــــانك ** وصعب على غيرك ايجي في مكانك

بعد مـا روينـا شاربيـن حنانـك ** نموت بالعطش عالغير صايم صايم‬

أوقات نبقى طارب ** وأوقات نبقى باللسان انحارب

واوقات حتى الراي عندي خارب ** وأوقات فرخ البوم ضدي ضده

أوقات فيا الحيلة ** وأوقات كيف الصيد في الحبيلة

وأوقات نبقى صقر بو كمبيلة ** وأوقات نبقى بين شده وفده

أوقات نبقى باهي ** وأوقات نبقى في همومي لاهي

وأوقات حتى المر عندي باهي ** وأوقات حتى الحلو مايتعدى‬

من كثر ماهم قاسيات أوجاعي ** الناس رقدت وانا بروحي واعي

الناس رقدت وارتاحت ** وهمومهم بعد لرقاد انزاحت

وأنا خاطري فيه الهموم اجتاحت ** نين دمعتي مسحتها بذراعي

الناس راقدين هنايا ** ونسيوا مشاكلهم مع التغطايا

وأنا ابروحي ماونيس معايا ** نجوم السما عديتهن بصباعي‬

تحياتي لكم